ޒިންމާދާރު ރައްޔިތުންގެ މަޖިލީހެއް އުފަންކުރެވޭނީ ހަމަ ދިވެހި ރައްޔިތުންނަށެވެ. ރައްޔިތުން އެދޭ ރައްޔިތުންގެ މަންދޫބުންތަކެއް އިންތިހާބު ކޮށްގެންނެވެ. މިގޮތުން ބަލާއިރު، ޑިމޮކްރަސީއެއްގައި މަޖިލީހުގެ މެމްބަރުންގެ ދައުރަކީ ވަރަށް މުހިއްމު އެއްޗެކެވެ. ޑިމޮކްރަސީއަކީ ރައްޔިތުންގެ ޚިޔާލާ، ފިކުރާ، ވިސްނުމާ، ބޭނުމާ ގުޅިލާމެހިފައިވާ އެއްޗަކަށް ވާއިރު، މައުނަވީ ޑިމޮކްރަސީއެއް ގާއިމުކުރުމަށް ރައްޔިތުންގެ މަންދޫބުންގެ ދައުރު ފުޅާކުރަން ޖެހެއެވެ. އެމީހުންނަކީ ޢަބުރުވެރި، ތެދުވެރި، އަމާނާތްތެރި، އިޚްލާޞްތެރި ބަޔަކަށް ވާންޖެހެއެވެ. ރައްޔިތުންގެ އިޙްސާސްތައް ރަނގަޅަށް ދަންނަ ބަޔަކަށް ވާންޖެހެއެވެ. ރައްޔިތުންނާއި ގުޅުން ބަދަހި ، ތަފާތު ނުފޫޒުތަކުން އެއްކިބާ ވެފައިވާ ސީދާ ރައްޔިތުންގެ މަންދޫބުންނަށް ވާންޖެހެއެވެ. މަޖިލީސް ނޯންނަ ދުވަސްވަރު ކޮންމެ މަންދޫބަކުވެސް އިންތިހާބުވީ ދާއިރާގައި ގިނަ ވަގުތު ހޭދަކުރުމަކީ މުހިއްމު ކަމެކެވެ. މިއީ ޑިމޮކްރަސީގެ މަގެވެ. ރައްޔިތުން އެދޭ ގޮތެވެ.
ރައްޔިތުންގެ މަންދޫބުންގެ މަސައްކަތަކީ ތެދުވެރިކަމާއި އިޚްލާޞްތެރިކަމާއި އެކު ކުރަންޖެހޭ ޤައުމީ މަސައްކަތެކެވެ. އިސްލާމްދީނުގެ އަޞްލަކާއި ޚިލާފު އެއްވެސް ޤާނޫނެއް ރައްޔިތުންގެ މަޖިލީހުން ފާސްކޮށްގެން ނުވާނެކަމަށް ޤާނޫނު އަސާސީގައި ބަޔާންކޮށްފައި ވާއިރު، މިމަސައްކަތުގެ ތެރޭގައި ޤާނޫނެއްގެ އެފަދަ މާއްދާއެއް ފާސްކުރަން ވޯޓު ދިނުމަކީ އެއްވެސް މެމްބަރަކު ކޮށްގެންވާނެ ކަމެއްނޫނެވެ. އަދި އެއްވެސް ދިވެހި ރައްޔިތަކު އެދޭނެ ކަމެއްވެސް ނޫނެވެ. "ރައްޔިތުންގެ މަޖިލީހުގެ މެމްބަރުން ޢަމަލުކުރަންވާނީ، ޤައުމީ މަޞްލަޙަތާއި ރައްޔިތުންގެ ލާބަޔާއި މަންފާއަށް އިސްކަންދީގެންނެވެ. އަދި އެއްވެސް މެމްބަރަކު އެ މީހެއްގެ ނުވަތަ އެ މީހަކާ ޚާއްޞަ ގުޅުމެއް އޮތް އެހެން މީހެއްގެވެސް ޒާތީ މަޞްލަޙަތެއް ކުރިއެރުވުމަށް މަޤާމުގެ ބޭނުންކޮށްގެނެއް ނުވާނެއެވެ. އަދި އެބައިމީހުން، އެބައިމީހުން އިންތިހާބުވީ ދާއިރާތައް ތަމްސީލުކުރުމުގައި މުޅި ޤައުމާއި ހުރިހައި ރައްޔިތުންގެ ލާބަޔާއި މަންފާއަށް ރިޢާޔަތްކުރާންވާނެއެވެ." މިއީ ރައްޔިތުންގެ މަންދޫބުންގެ މަސައްކަތުގައި ރިޢާޔަތްކުރަންވީ ކަންކަން ކަމުގައި ޤާނޫނު އަސާސީގައި ބުނެފައިވާ ކަންކަމެވެ.
އެހެންކަމުން، މިފަހަރު ދިވެހި ރައްޔިތުން އެދެނީ، މިދެންނެވި ކަންކަމަށް ރިޢާޔަތްކުރެވޭނެ، ޤާބިލު، ރައްޔިތުންނަށް އިޚްލާޞްތެރި، ތެދުވެރި، ރައްޔިތުންގެ މުދަލާ ފައިސާއަށް ޚިޔާނާތްތެރި ވެފައިނެތް، އަދި ޚިޔާނާތްތެރިން މިގައުމުގެ ވެރިކަމަށް އައުމަށްނޭދޭ، އަމިއްލަ އެދުމުން އެއްކިބާވެތިބި، ޤައުމާ ރައްޔިތުންގެ ހެވާލާބައަށް މަސައްކަތްކުރާނެ، މަންދޫބުންތަކެއް އެކުލެވޭ ޒިންމާދާރު ރައްޔިތުންގެ މަޖިލީހަކަށެވެ.
ނިމިދިޔަ ރިޔާސީ އިންތިހާބުގައި ދިވެހި ގިނަ ރައްޔިތުން ވޯޓުދިނީ ވަޠަން އެދޭގޮތަށެވެ. ބަދަލަކަށެވެ. ހަމައެއާއިއެކު، ދިވެހިރައްޔިތުންގެ މިފަހަރުގެ ވޯޓު ރައްޔިތުން އެދޭ ގޮތަށް ދިނުން މުހިއްމެވެ. ޕާޓީގެ ކެނޑިޑޭޓެއް ކަމުގައިވިއަސް، ނުވަތަ އަމިއްލަ ކެނޑީޑޭޓެއްކަމުގައިވިއަސް، ބަލަންޖެހޭނީ އެންމެ ފުރިހަމަ ގޮތުގައި ރައްޔިތުން ތަމްސީލުކޮށްދެވޭނެ އަދި މިކަމަށް އެންމެ ޤާބިލު މީހަކީ ކޮބައިތޯއެވެ. އެހެނީ، ރައްޔިތުންގެ މަޖިލީހަކީ ވަކި ޕާޓީއެއްގެ ތަނަކަށް ހެދުމަށް ކުރެވޭ މަސައްކަތަކީ ރައްޔިތުން އެދޭ ގޮތެއް ނޫނެވެ. އަދި އެއިރުން މަޖިލީހުގެ ތަޅުމުގައި ރައްޔިތުން އެންމެ ފުރިހަމަ ގޮތުގައި ތަމްޞީލުވަމުން ދާނެކަމާއިމެދު ޝައްކެވެ. މިހުރިހާ ކަމަކަށް ރިޢާޔަތްކޮށް މިފަހަރު ރައްޔިތުންއެދެނީ، އެ މެމްބަރުންގެ މަޞްލަޙަތާއި އަދި ޕާޓީތަކުގެ މަސްލަޙަތުވެސް، ރައްޔިތުންނާއި ޤައުމުގެ މަޞްލަޙަތަށްވުރެ އިސްކުރަން ބިރުގަންނަ، އެކަން ނުކުރާނެ އަދި އިސްލާމްދީނަށް ފުރިހަމައަށް ބޯލަނބާ، ތެދުވެރި، އަމާނާތްތެރި ބަޔަކު އިންތިހާބުކުރުމަށެވެ. މިފަދަ މަޖިލީހަކަށް ކުރެވޭ އިންތިޒާރީގައި ދިވެހި އެންމެހާ ރައްޔިތުން ތިބިކަމުގައި އަޅުގަނޑު ޔަޤީންކުރަމެވެ.
No comments:
Post a Comment