ޖަމާޢަތްތަކެއްގެ ގޮތުގައި ދިރިއުޅެމުން އަންނަނީ ހަމައެކަނި އިންސާނުންކަމުގައި ޤަބޫލުކުރާ ބަޔަކު އަދާ ހަމައަށްވެސް އުޅެއެވެ. އެހެންނަމަވެސް އެއީ ކުށް ހީ އެކެވެ. ކަމުގެ ޙަޤީޤަތަށް ރުޖޫޢަ ވުމުން އެނގެނީ، ބިމުގައި ލައްވާފައިވާ އެއްވެސް ދިރޭ އެއްޗެއް އެކަނި ޙާލަށް ދޫކޮށް ނުލައްވާ ކަމެވެ. މިގޮތުން އެންމެހާ އިންސާނުންނާއި އެހެނިހެން ދިރޭތަކެތިވެސް ބިމުގައި ލައްވާފައިވަނީ އުއްމަތްތަކެއްގެ ގޮތުގައެވެ. ޖަމާޢަތްތަކެއްގެ ގޮތުގައެވެ. ހަމައެއާއިއެކު މިއިން ކޮންމެ ބައިގަނޑެއް އުފެދިފައިވަނީ އެކަތި އަނެކައްޗަށް އެހީތެރިވެ އުޅެވޭނެ ގޮތުގައެވެ. އެބައެއްގެ އެންމެހާ އަފުރާދުން ޙިމާޔަތްކޮށް ރައްކާތެރި ކުރެވޭނެ ފުރިހަމަ ނިޒާމެއް އެކުލެވޭ ގޮތުގައެވެ.
ކީރިތި ޤުރްއާނުގެ ސޫރަތުލް އަންޢާމުގެ 38 ވަނަ އާޔަތުގައި ﷲ ތަޢާލާ ވަހީ ކުރައްވާފައިވާ ބަސްފުޅުގެ މާނައިގައި ވެއެވެ. "ފުރާނައެއްހުރެގެން ބިމުގައިއުޅޭ ދިރޭ ކޮންމެ އެއްޗެއްވިޔަސް، އޭގެ ދެފިޔައިން އުދުހޭ ދޫންޏެއްވިޔަސް، ތިޔަބައިމީހުން ފަދަ އުއްމަތްތަކެއް ކަމުގައި ނޫނީނުވެއެވެ". މީގެ އިތުރުން، އަދުގެ ސައިންސްގެ ދިރާސާތައް ދައްކާ ގޮތުން ޖަނަވާރުންނާއި ދޫނިތައްވެސް ދިރިއުޅެނީ ޖަމާޢަތްތަކެއްގެ ގޮތުގައެވެ. މިކަމަށް އިތުރަށް ބާރުލިބިގެންދަނީ އެސޮރުމެންގެ ދިރިއުޅުމުގެ އެންމެހާ އިންތިޒާމުތަކާއި މަސައްކަތްތައް އަހަރެމެންގެ ލޮލަށް ފެނުމުންނެވެ. ހަމަ ލޮލުން ބަލައިލުމުގެ ނަސީބު ކޮންމެ މީހަކަށް ނުލިބުނު ކަމުގައިވިޔަސް، ދިރޭތަކެއްޗާއި ބެހޭ ޚާއްޞަ ޓީވީ ޗެނަލްތަކުގެ ޒަރީޢާއިން ދިރޭތަކެތީގެ މިފަދަ މަންޒަރުތައް މިއަދު ފެނެއެވެ. މިކަންކަމުގެ ވާހަކަ ކީރިތި ޤުރްއާނުގައި ބަޔާންކުރައްވާފައިވަނީ މީގެ 1400 އެތައް އަހަރެއް ކުރިންނެވެ. ސައިންސްގެ ދިރާސާތަކުގެ އެތައް ޤަރުނެއްގެ ކުރިންނެވެ. އަދި މިއަދު މިޙަޤީޤަތްތައް ދޮގު ކުރެވޭނެ އެއްވެސް މަގެއް ނެތެވެ.
ދިރޭ ކޮންމެ އެއްޗެއް ޖަމާޢަތްތަކެއްގެ ގޮތުގައި ލައްވާފައިވުމުގެ މަތިވެރި ޙިކުމަތްތަކެއް ވާނެއެވެ. އެއީ އެކަންކަމާއި ދޭތެރެ ވިސްނުން ހުރި ކަންތައްތަކެކެވެ. ދިރޭ ކޮންމެ އެއްޗެއްގެ ބައިގަނޑުގެ މެދުގައިވާ ބަދަހި ގުޅުމާއި އެކުވެރި ކަމެވެ. އެކަތި ގަނޑެއްގެ ގޮތުގައި މަސައްކަތް ކުރުމާއި އަޖައިބުކުރުވަނިވި އެހީތެރިކަމެވެ. އެސޮރުމެންގެ ކޮންމެ ފަރުދެއްގެ ޙިމާޔަތަށް އަޅާފައިވާ ފިޔަވަޅުތަކެވެ. އަދި އެސޮރުމެން ޝިކާރަކުރުމަށް މަސައްކަތްކުރާ އެހެނިހެން އެއްޗެހީގެ އަތްދަށުން ސަލާމަތްވެވޭނެ ފުރިހަމަ އުކުޅުތަކެވެ. މިއިން ކޮންމެ ކަމެއްގެ ފަހަތުގައިވަނީ ދިރޭތަކެތީގެ އެކުވެރި ބައިގަނޑެވެ. ޖަމާޢަތެއްގެ ގޮތުގައި ވުމެވެ.
ދުނިޔެއިން ދިރޭތަކެތީގެ ނަސްލު ނެތިދާ ތަފާތު ބަހާތަކާއި ބެހޭ ގޮތުން 'ކޮންޒަވޭޝަން ބައޮލޮޖ'ީގައި ކިޔަވައިދޭނެއެވެ. އަދި މިދެންނެވި ބަހާތަކުގެ ތެރެއިން އެންމެ ފާހަގަކޮށްލެވޭނީ އެތަކެތީގެ އާބާދީގެ ކުޑަ ބޮޑު މިނަށް އަންނަ ބަދަލުތަކުގެ ނަތީޖާއެވެ. ކުދި ކުދި އާބާދީ ތަކެއްގެ ގޮތުގައި ބެހިގެންދާ ސަބަބުތަކާއި ދިރޭ ކޮންމެ އެއްޗެއްގެ އާބާދީ ކުޑަވުމުން ކުރިމަތިވާ ގޮންޖެހުންތަކެވެ. އެސޮރުމެން އެހެންތަކެތީގެ ޝިކާރައަކަށްވެގެންދާ ފަސޭހަކަމާއި ދިމާވާ ޙާދިސާއެއްގެ ސަބަބުން ކުރާ ބޮޑު އަސަރެވެ. މިއީ ޖަނަވާރުތަކާއި ދޫނިތަކާއި ގަސްގަހާގެހީގެ ވާހަކައެވެ. އެތަކެތީގެ ނަސްލު ނެތިގެން ދިއުމަށް މެދުވެރިވާ މައިގަނޑު ބައެއް ކަންކަމެވެ. މީގެ އިތުރުން އިންސާނުންވެސް ބިމުގައި ލައްވާފައިވަނީ އުއްމަތްތަކެއްގެ ގޮތުގައެވެ. މިހާހިސާބުން ނިކަން ފިކުރުކޮށްލަބަލާށެވެ. މުސްލިމު އުއްމަތުގެ ޢަދުއްވުން މުސްލިމުންގެ އާރާއި ބާރު ނެތިކޮށްލުމަށް މިއަދު ބޭނުންކުރަމުން އަންނަނީ މުސްލިމުންގެ އާބާދީ މަދުކޮށް އަދި މިއުއްމަތް ބައިބައިކޮށް ވަކިވަކި ކޮށްލުމުގެ އުކުޅުތަކެވެ. އެފަދަ ދަންތުރަ ތަކެވެ. އެހެންކަމުން މުސްލިމު އުއްމަތް ރޫޅިފައިވާ މިފަދަ ދުވަސްވަރެއްގައި، ޖަނަވާރުންނާއި ދޫނިތަކުގެ ޖަމާޢަތްތަކުގެ ދިރިއުޅުމުން ޢިބްރަތް ޙާޞިލުކުރުން މުހިއްމުކަމުގައި ދެކެމެވެ.
No comments:
Post a Comment